காதல்

ஒரே ராசி, நட்சத்திரம் உள்ளவர்கள் திருமணம் செய்வது நல்லதா, தவறா?

ஒரே ராசி, நட்சத்திரத்தை சேர்ந்தவர்கள் திருமணம் செய்தால் பல்வேறு பிரச்னைகளை சந்திக்க நேரிடும் என ஜோதிட வல்லுனர்கள் கருத்து தெரிவிக்கின்றனர்.

திருமணம் என்பது ஒருவரின் வாழ்வின் மிக முக்கிய அங்கம். சமூகத்தின் முதல் புள்ளி குடும்பம். அந்த குடும்பம் வாழ்க்கை முறை உருவாக்கும் அம்சமாக திருமணம் உள்ளது.

திருமணம் என்றது நாம் முதலில் திருமணம் செய்ய இருக்கும் ஆண், பெண்ணின் ஜாதகத்தை வைத்து பொருத்தம் பார்ப்பது வழக்கம். ஒரே ராசி, நட்சத்திரம் கொண்டவர்கள் திருமணம் செய்யலாமா, செய்யக்கூடாதா?, இதனால் ஏதேனும் பிரச்சினைகள் ஏற்படுமா என பல சந்தேகங்கள் கிளம்புவதுண்டு.

திருமண பொருத்தம் என்றால் என்ன?
திருமணம் என்பது கணவன் – மனைவியாக இணையும் இருவரின் மகிழ்ச்சியான வாழ்க்கை, தாம்பத்தியம், குழந்தைப்பேறு, ஆயுள், செவநிலை, சுபிட்சமான எதிர்காலம் என பல்வேறு அம்சங்கள் எப்படி இருக்கும் என்பதை, இருவரின் ஜாதகத்தை வைத்து அவர்களின் ராசி, நட்சத்திரம் மற்றும் ஜாதகத்தில் உள்ள கிரகநிலையைப் பொறுத்து ஜோதிடர்கள் கணித்து கூறுவது வழக்கம்.

திருமணம் செய்ய இருவருக்கும் ஒரே ராசி, நட்சத்திரமாக இருந்து அவர்களுக்கு பொருத்தம் பார்க்கும் போது, அவர்களின் அவர்கள் பிறந்த நட்சத்திரத்தை வைத்து 10 பொருத்தங்கள், கிரக நிலையை வைத்து அவர்களின் திருமணம் முடிவு செய்யப்படுகிறது.

ஒரே நட்சத்திரமாக இருந்தால் என்ன பிரச்னை?
திருமணம் செய்யும் ஆண், பெண்ணுக்கு ஒரே நட்சத்திரமாக இருந்தால், நட்சத்திர பொருத்தத்தில் 10க்கும் மேற்பட்ட பொருத்தங்கள் இருந்தாலும், திருமணத்தின் மிக முக்கிய பொருத்தமான மாங்கல்ய பொருத்தம் இருக்காது.

அதனால் ஒரே ராசி, நட்சத்திரத்தில் திருமணம் செய்வதை கண்டிப்பாக தவிர்க்கப்பட வேண்டும்.

அதுமட்டுமல்லாமல் ஒரு ராசிக்கு ஏழரை சனி, அஷ்டமத்து சனி வரும் சமயத்தில், அது தம்பதி இருவருக்கும் பாதிப்பு ஏற்படும். இதனால் குடும்பத்தில் கருத்து வேறுபாடு ஏற்பட அதிக வாய்ப்புக்கள் உள்ளது.

ஒரே ராசியாக இருந்தாலும், அந்த பெண்ணுக்கு உள்ள நட்சத்திரத்திற்கு பின் உள்ள நட்சத்திரம் ஆணுக்கு இருந்தால் நன்மை ஏற்படும்.

ஒரே ராசியாக இருந்தால், இருவரின் ரசனையும் ஒரே மாதிரியாக இருக்கும் தான், ஆனால் கிரக நிலைகள் மோசமாகும் போது, இருவரும் அதிகம் பாதிக்கப்படும் சூழல் தான் இருக்கும். இதனால் ஒரே ராசியாக இருப்பினும், வெவ்வேறு நட்சத்திரமாக இருந்தால் பிரச்னைகள் குறையும்.

பிரச்னை எப்படி வரும்?
பகையோனி நட்சத்திரத்தாரை திருமணம் செய்யக் கூடாது. அப்படி செய்தால் எலியும், பூனையும் போல் ஓயாத பிரச்னை இருக்கும்.முதல் எதிரி நீதான் என சபதம் போட்டுக் கொள்ளும் அளவிற்கு குடும்ப வாழ்க்கையில் குழப்பம் இருக்கும்.

பெண்ணிற்கு 7வது நட்சத்திரத்தை சார்ந்த ஆணை திருமணம் செய்வதால் தினம் சித்தரவதை தான்.

பெண் நட்சத்திரத்துக்கு 12, 17வது நட்சத்திரத்தில் பிறந்த ஆணை திருமணம் செய்தால் துரதிர்ஷ்டம், தரித்திரம் உண்டாகும்.

பெண்ணிற்கு 22வது நட்சத்திரத்தில் பிறந்த ஆணை திருமணம் செய்யும் போது அவனுக்கு ஆயுள் குறைவு, மாமியார் ராசிக்கு, மருமகள் ராசிக்கு 6,8வது ராசியாக வந்துவிட்டால் எதுவும் சொல்லாமல் மகனையும், மருமகளையும் தனிக்குடித்தனம் வைத்துவிடுவது நல்லது.

இதனால் பல பஞ்சாயத்துக்கள், மண்டை உடைப்புக்களை முன்கூட்டியே தடுக்க வழிவகுக்கும்.

இணையக்கூடிய நட்சத்திரங்கள்:

திருமணம் செய்ய இருக்கும் ஆண், பெண் இருவருக்கும், ரோகிணி, திருவாதிரை, மகம், அஸ்தம், உத்திரட்டாதி, ரேவதி, விசாகம், திருவோணம் ஆகிய நட்சத்திரங்களில் இருவருக்கும் ஒரே நட்சத்திரமாக அமைந்திருப்பின், அவர்களுக்கு திருமணம் செய்து வைப்பது மிகவும் உத்தமம்.

அசுவினி, கார்த்திகை, மிருகசிரீஷம், புனர்பூசம், பூசம், பூரம், உத்திரம் சித்திரை, அனுஷம், பூராடம் உள்ளிட்ட நட்சத்திரங்களில் இருவரும் ஒரே நட்சத்திரமாக கொண்டவர்கள், பரிகாரத்திற்குப் பின் திருமணம் செய்து வைக்கலாம்.

திருமணம் செய்யக்கூடாத ஒரே நட்சத்திரங்கள்
பரணி ஆயில்யம், சுவாதி, கேட்டை, மூலம், அவிட்டம், சதயம், பூரட்டாதி இவற்றில் ஒன்றை ஆண், பெண் இருவரும் கொண்டிருப்பின், அவர்கள் திருமணம் செய்யாமல் இருப்பது நல்லது. இவர்கள் இணையும்பட்சத்தில் அவர்களின் வாழ்க்கையில் மிகப்பெரிய பிரச்னைகள் ஏற்படலாம்.

Most Popular

To Top